如果你女朋友係 28-33歲,咁你就要小心佢地咁做......

BigBoysClubAisa     2016-11-10     檢舉

做咗婚姻介紹一段時間,作為一個男人,我真心覺得有啲說話要同一眾男人講一講,尤其是你女朋友係28-34歲呢個Range。

第一,香港,女多男少。第二,男人娶大陸女人既比例,比女人嫁大陸男人比例高。第三,女性的學歷、收入越來越高,比好多年齡相近的男性為高,而「女人嫁比自己叻的男人」既呢個傳統價值觀,令女人越來越難搵到對象。(雖然我唔認同呢個諗法,無奈咁樣諗既人依然好多。)再加上工時長,生活圈子細等等的問題,令到香港真係好多「盛女」。

呢一班「盛女」,年齡一進入30中,就會出現無人要的現象。就算佢依然好靚、好好身材,但依然係無人要。有部份更係有車有樓有錢有事業,唔好意思,佢更加無人要。原因?我係男人,我明。如果你都係男人,我估你都明。

唔記得邊個講的,但好精景的一句話:「男人,係十分專一的動物。無論乜嘢年紀,18、28、38、48、58定68歲的男人你問佢鍾意乜嘢女人,佢都係答你 18歲。」千真萬確。 (頭盔:當然,我好愛我老婆。無論佢幾歲都愛。)

點解男人都會喜歡後生啲既女人? 我個人覺得係天性,係動物的本能,要傳中接代。雖然我唔打算生小朋友,但「性」這個天性會令我想搵後生女,女人年紀越大,生仔機會越細。 (這個純粹係我個人想法,沒有証據的,不喜勿插。)不論原因,男人喜歡後生女人,這是事實,最起碼大部份都係。

係咁樣的前提下,男人,會寧願要後生但唔靚,都唔會要一個老但靚。

我唔係話男人,會離開自己既伴侶去搵後生的女人。因為當愛去到你決定會同個女人相依到老,係另一個層次。

我講既係,未選定伴侶的男人,大部份都係選擇搵後生女。(後生女要唔要老男人?下次再講。)我面對過很多男性客人,講到明唔會見40歲(或甚35歲)以上的女性,因為佢打算婚後生仔。 你或者會話 40歲都仲生得?係,但這是機率問題。

是不是女人到了40歲沒有男朋友,就結婚無望? 這當然不是。 成功的例子經常會見到,你睇嚇羅琳、郭羨妮。無話嫁唔出。 事實係女人每大一年,要找伴侶,需要花的力氣越大。

我在此,特意向一眾男士講:「唔該你依家問一問你自己,你有沒有真心打算,會同現在的女朋友,相伴終身?」 我唔會講結婚,因為唔結緍唔代表唔可以長久係埋一齊。 如果你反覆問自己,都覺得你現時既女朋友,唔會係未來30-40年每日見到的女人,生活在一起的女人,那麼,請你早點放手,放生那個女人。

如果你女朋友係 28-33歲,而你又沒打算會跟她長久在一起,那麼,請你早點讓她找尋她人生的另一半。